البوابة
أحدث الصور
heshmat elhefni السبت يونيو 07, 2014 9:28 pmكل شىء جوايا بيموت
حتى السكوت مات و شبع م الموت
و لما جيت لك حبيبى أصرخ
ما بقاش بيطلع أى صوت
****
فاكر لما كنا بنرسم فى ليالينا الأمل
و نبتسم
بسمتنا كانت على حجر منحوت
دلوقت تاهت ضحكتى
خطوتى
وسط الغمام ما تفوت
****
و الذكريات اللى كانت شاهدة
على حبنا
ع الضحكة اللى كانت بتطبع قمر
على خدنا
صبحت عتمة قبور
على أرضها ورق الشجر دبلان
بقى الهشيم مبدور
عايش بلا روح
يرضيك حبيبى البسمة منى .... تروح ؟
هو البعاد مكتوب علينا قدر
و الهجر ليه مسموح ؟
****
بعد ما شافت عينيا فيك الفرح
و بيك الأمل
مرسوم
ما طلبت منك غير طلتك
لاجل تحلى بيها دنيتى
و سعادتى بيك هاتدوم
فجأة لقيتنى فى غربتى
شايل حمول و هموم
و بعد ما كنت عاشق
بقيت أنا
المكلوم
****
تسمح لى حبيبى فى رجا
امسك إيديا و وقول
ده عهد بينى و بينك
أهواك كده على طول
و إن غيبت عنك يوم
ده مش بإيدى
ده أكيد .... أكيد الموت
ساعتها أحلف ما أسيبك
لو الجبال هاتزول
